وكأن الثقل تهمة... والخفة صنعة
يا بخت من زار وخفف، بس لو تقل!
لو تقل وقعد 85 سنة، وفضل يشتغل لحد أخر وقت، إعلانات تلاقيه، مسلسلات يسند فيها بنته تلاقيه، لكن بدون ما نحس أبدا إنه بيزق بنته أو بيفرضها علينا،
في وقت نادت فيه ناس كتير عادل إمام إنه ينسحب من الساحة، كنا بنادي إن سمير غانم يظهر أكتر، يعمل برامج حتي كضيف يتكلم فيها عن أي حاجة، أي كلام، طب حتي اطلع وما تتكلمش،
من شهرين كدة ظهر لي مقاطع فيديو من برنامج السيرة مع وفاء الكيلاني، الساعة 7 الصبح أول ما فتحت فيسبوك لما صحيت من النوم، بكون فعلا مش طايقة أسمع صوت الهوا، دخلت الحمام أخد شاور وأنا ماسكة الموبايل وفاتحة الفيديو، كنت بلبس هدومي ونازلة والفيديوهات شغالة وأنا منصتة تمام، ركبت العربية وشغلت الصوت علي الكاسيت وبسمعه، زي ما أكون بسمع أغنية،
لأ زي ما أكون بسمع أبويا لما كان يفضل يرغي ويحكي عن جوازاته، عن حياته قبلي، عن نفسه، عن مشاعره، بيسف، بيهري، بيضحك، بيسخر، أبويا والله جدا!
طب ما هو عمل #كابتن_جودة كلها حكم تربوية ومسؤلية، بس ما دوشناش زي محمد صبحي، سف وضحك وأبكي وعمل من الأبيض والإسود مع الثلاثي وفضل واخد ف وشه للتمانينات مع محمود عبدالعزيز والفيشاوي وكمل علي فطوطة، عمل حاجة مانعرفش نعملها بكل التطور التكنولوجي ده، وكمل وكمل...
عمري ما كنت أتخيل أحزن أوي كدة علي الراجل ده، لكني حزنت علي بناته اللي حاسة بيهم، ده راجل غير عادي، ما بالك كأب هيكون إيه، وزوج يكون إيه، كلامه عن دلال يدخلها قلبك حتي لو هي ف العادي تقيلة، بس كلامه عن أصلها وطيبتها ومجاملتها خلاني أدوب والله،
اخترت الصورة اللي نزلتها بنته، لإني حسيت بوجعها جدا، ربنا يرحم شخص كان جاد في عمله حتي لو كان هلس، أطال الله في عمره وحسينا إنه كان مفروض يقعد أكتر، كان محبوب وعنده قبول حتي من ورا شاشة زجاج، حسينا إنه حقيقي رغم إنه جاي من عالم خيالي ماشوفناهوش،
بنحبك يا سمير ونحبوا اللي يحبك❤
#وياليل_طول_شوية
"بصوت سمير في فرح إيمي سمير غانم🌹
لك منا كل تحية، سأختار أن أقابلك إذا سنحت الفرصة في عالم آخر
انا من اشد معجبينك بقالي سنة بحاول أتواصل معاكي وبعتلك كتبر ع الفيس ممكن نتكلم
ردحذفانا من اشد معجبينك بقالي سنة بحاول أتواصل معاكي وبعتلك كتبر ع الفيس ممكن نتكلم
ردحذف