إسعاد يونس عاملة لقاء مع موسيماني!
ست لطيفة فعلا لطف غير عادي،
تحسها أوبرا وينفري الغلابة،
الأسئلة طالعة بسلاسة وجمال، وفي مترجم فوري ف الخلفية بس بطريقة ماتضايقش أبدا المشاهدين،
حاجة مستوية سنين وسنين، برضه الخبرة والنضج الزيادة له طعم جميل،
أخر اللقاء ملفت جدا،
بتقوله هعزمك علي ملوخية وممبار وحمام محشي، هطبخ لك بنفسي، هتيجي بيتي وهوديك الأهرامات، كلنا بنحبك وبندعمك ومبسوطين إنك في مصر❤
والله بكيت، الإنسانية دي أجمل حاجة ف الدنيا، دعم يجيلك من شخص مايعرفش عنك غير إسمك،
هو كمان وشه فيه سماحة غير عادية، تحسه بطل فيلم أمريكاني من أصل أفريقي طيب وغلبان كدة بس شاطر وحريف وعارف بيعمل إيه،
ربنا بديع، وبيترك أثر إبداعه ف قلوب ناس كتير، منها إسعاد يونس، هي فعلا بتسعد بإنسانيتها ورقة قلبها برغم طريقتها الرجالي اللي كلها مجدعة دي،
وربنا بديع، عشان بيخلي حد من بلد وظروف نشأة مختلفة ولغة ودين تاني، يروح بلد مختلف عنه ويولف قلوب البشر علي بعض بسبب شغلته،
بديع أثرك يارب ف الكون
بس مش هقدر أنكر، إن أحسن حاجة حد يقولها لحد، إنه يطبخ له، الأكل ده من لذائذ الحياة زي ما قال الفخراني وأبلغ معاني الحب هو ما وقر في معدة الحبيب، وصحيح الحبايب بيفتحوا النفس واللي ما يعرفش حب الأكل ف حب الحبيب يبقي ما داقش الحب❤
#Mai_Mix
#صاحبة_السعادة
0 التعليقات:
إرسال تعليق