#يوميات_المواطن_سكر
يوم 7
طالع السلم، يا سلام سلم، تقولشي سويقة، زحمة وحر تقولشي حريقة، بياعين يامااا، ايشي جرايد، ايشي سميط، تحف، نجف، قفف قفف، ومن ده كتير..
دخل لمديره..
صباح الخير.. يا سعادة البيه!
منين الخير.. يا ابن الإيه؟
ليه يا ريس، ما كنت كويس..
يومك قعر قدرة مدمس..
يا ساتر استر..
مخصوملك ست اشهر..
حيث بقا انهم مخصومين، الحق اروح اعيشلي يومين..
لو عليا أخصملك سنتين..فز..غور..اطلع برة..يا وش الغبرة..
طالع اهو، وعوضنا علي الله!
........؟..............؟..................؟....؟..............
ماشي يعيط، فجأة زقطط، أخيراً ساب وش النحس، بوز الإخص..
جه الوقت عشان يرتاح، بكل ألاطة اشتري تفاح، لأ يا سكر ده آخر قرش، اهدا شوية وما تفرتكش، روح سكر قوام ع البيت، حضر كرسي وحتة خيط، كل تفاحه، ريح ساعة، صحي من نومه..جاب الكرسي..وجاب الخيط، علق راسه قوام ع الحيط، خبط الكرسي جابه الأرض، سقط جسمه قوام واتشد، مات السكر، مات وف باله، عدد بكرة من الأهرام، وصويت الناس بتقول يا حرام، مانشيت الصفحة الأولي ببونط عريض، مكتوب ع السقف وع الحيط "مواطن يشنق نفسه ببكرة خيط!"
0 التعليقات:
إرسال تعليق