سيرة حب

 #ياللي_ظلمتوا_الحب

من حوالي 28 سنة كدة، كان عندي يجي 6 سنين، وكان في بنت من أخوات صاحب أخويا كانت بتتجوز، كان إسمها عبير، وكانت فعلا هي وإخواتها البنات وهي بالذات شبه عايدة الأيوبي جدا، ويمكن ده اللي خلاني مغرمة جدا بعايدة الأيوبي وكنت بقول عليها عبير أحيانا، ولما أشوفها كنت أغني "لا يا مصري لا، تهجر بلدك وتسيبها، بلدك بيك أولي"، في الحقيقة مش دي الحدوتة...

الحدوتة إن ف عز حبي ليها، كانت مخطوبة لواحد قمر كدة، وكنا بنروح عندهم كتير وأنا كنت بحبه جدا، بعدين راحت الأيام ويمكن دخلت المدرسة، وانشغلنا أنا وأمي وولدت أخويا ف الوقت ده، وبعدين ف يوم قالوا ده النهاردة فرح عبير، طبعا لبست الشياكة بقا عشان فرح حبيبة القلب، وبسنتين قدام مخلوعين بيتغيروا من اللبنية للأساسية، روحنا الفرح...

وكانت الصدمة! مش ده العريس يا ماما، مش ده عمو سيد وقعدت أعيط شوية، وسألت السؤال!

ليه يا ماما عبير ماتجوزتش سيد، هي مش كانت بتحبه، مش فاكرة رد فعل غير يمكن شخطة أمهاتي وبصة وخلاص، ويمكن تنهيدة، إسمها النصيب، إسمها أهو كدة، ماحدش عارف لحد دلوقتي، المهم إن بقا عندها عيال من جوزها الجديد وأبوها وأمها ماتوا، وهي دي الحياة...

طب هو فين الحب؟ طب هو إيه الحب! طب ليه الحب مش بيستمر؟ طب ليه حد ممكن يسيب حبيبه ويحب غيره؟ 

ماحدش عارف!

السؤال ده فعلا فضل يطرح نفسه، والأكبر منه كان سؤال #هو_إمتي_هنعرف إن ده الشخص اللي بنحبه وعايزين نكمل معاه، ما البشر بالمليارات، مين هيقول لنا مين نحبه ومين لأ، وهل بقا ممكن الواحد يتوه في الزحمة دي ويحب ملايين!

والله ممكن، وارد جدا، وارد يحب كتير، وارد مايحبش خالص، الحب أصله عملية معقدة جدا، يمكن في ناس عاشت وماتت من غير ما تعرف إيه هو الحب، وفي أقاويل كتير إن الإنسان في أصل سعيه الدائم، هو السعي عن الحب، أو يعني سعي لتحسين حالته حتي يليق بالحب، بشخص يحلم به،

ومن فرط تعقيد الحب، إنه شئ صعب الاكتساب، حيائي لن يمنعني من التعبير بأنه لو ظبط من فوق، ممكن ما يظبطش من تحت، ولو ظبط من فوق وتحت، ممكن ما يظبطش بسبب المحيطات، من البيئة والناس والتدخلات والمخاوف والعقد اللي بتتربي وتكبر جوانا علي مر حياتنا، ويمكن رحمة من الله إن الإنسان عمره مش بيطول في المتوسط عن 70 سنة، إما أكتر أو أقل، الله أرحم بنا وبعقولنا من شتات الأمور...

في كل الأحوال، الحب مش لازم يكون سبب أبدا في ضرر لأصحابه أو لغيرهم، الحب مهما كان شئ جميل ولا يجب أن يتسبب في أي شئ يحوله لشئ غير الحب، وإلا كدة تبقوا ظلمتوا الحب، وتستحقوا نظرة الست ليكم بالطريقة دي!

#Mai_Mix

شاركه على جوجل بلس

عن Mai Hanem Hamada