كيف تخرج الدجاجة من الزجاجة؟
الحياة بتعقيداتها وأزماتها ساعات بيكون حلها بسيط جدا، بدرجة لا نتخيلها،،،
السؤال المعقد ممكن يكون إجابته ببساطة، إن من طرح السؤال فقط هو من يستطيع أن يجيب عليه!
أبويا في واحدة من حكايته، قررت أبقا سخيفة شوية معاه في الكلام وأسئله سؤال عمر ما حد كان يستجري يسأله...
هو انت ليه يا بابا اتجوزت ماما في تلات أيام!
سكت شوية وقال إنتي عارفة الإجابة ولا بتسألي بجد، قولت إني سمعت بصراحة إن كل الجيران أجمعوا إنك شخص قاسي، وما بيفرقش معاك حد، مراتك تموت وبعد الأربعين تتجوز واحدة في 3 أيام!
ضحك بابا شوية وبعدها وشه إسود وقال كلام عمري ما أنساه، "تفتكري في واحد يتمني مراته تموت وعياله تتلطم؟، الجيران اللي قالوا كدة دول ما قالوش إني كنت زي المجنون كل يوم أخبط عليهم وأعيط وأسألهم مراتي عندكم!، عارفة كانوا بيقولوا ده اتجنن ويا عيني وماخدش منهم غير مصمصة الشفايف!
إنتي عارفة إنها التانية اللي تموت، يعني دي مش أول مرة أتجوز واحدة وتموت!"
قد إيه خجلت من نفسي إني اضطريت أبويا يفتح قلبه بالشكل ده وعيونه تدمع، وفضل يحكي إنه بعد مراته الأولي ما توفت كان شاب عمره لا يتعدي 21 سنة ومعاه بنت، قرر بعدها يتزوج والموضوع أخد حوالي سنة، بيقول فضلوا الناس يتكلموا إنها كانت أخت صاحبي وأي كلام يتقال، أنا والله يا بنتي عمري ما كنت بصيت ف عينها غير يوم ما اتجوزتها، الناس كدة كدة مالهاش غير الكلام، لكن الحزن ده حاجة ف المخ،
كان لازم يكون لي وقفة مع نفسي، فضلت أقول الموت علينا حق، بس في بيت لازم يتفتح، وست لازم تيجي تصوني وتصون حياتي وولادي، وأنا لو فضلت دماغي مش شايفة غير إن مراتي ماتت وأنا هضيع، يبقي هضيع فعلا، ولو كنت سمحت للحالة اللي كنت فيها تكمل، كنت هضيع معايا أولادي التلاتة وأمي وأختي، لكن فضلت أفكر مين اللي دخل الفكرة دي في دماغي، وإن عشان أقدر أستمر وأكمل الحياة، لازم أطلع الفكرة دي من دماغي، فكرة إني ضعت وإن دي نهاية الكون، وإني ضعيف ومنتظر الشفقة، ولا إنتي إيه رأيك؟
الحقيقة انت أعظم راجل في الدنيا، لسه حكمتك معانا حتي لو عدي علي وفاتك 10 سنين❤
0 التعليقات:
إرسال تعليق