يوميات المواطن سكر-الخامسة

#يوميات_المواطن_سكر
يوم 5
اطلع يا اسطي، شد شوية..
رد الأسطي "ما تهدي يا سكر، ده مافيش أكتر، ليه مستعجل، ليه متبرجل؟"
رد السكر "أنا متأخر، حالي متعطل، عايز أوصل شغلي الأول!"
رد الأسطي "بكرة هتوصل، بكرة هتعقل، بكرة هتعرف ان النعمة انك ماتروحشي!"
رد السكر "تقصد إيه"، رد الأسطي "لا ما اقصودشي..
امسك عفر، لا مش لف، مكنة يا سكر، سلي السكة، تيجي أحكيلك؟"
رد السكر "تحكيلي إيه؟"
رد الأسطي "أحكيلك يوميات مواطن غلبان، صحي من يومه ف يوم طهقان، نزل الشارع ف يوم من بيته، بص كويس مالقاش عربيته، ينادي يمين، ينادي شمال، ماحدش جاوبه ولو بسؤال،
-يا اخواتي.. عربيتي كانت هنا امبارح، لونها نبيتي ف ازرق فاتح، كنت راكنها وطلعت أنام، مسافة الحلم وجالي زوكام، يوم والتاني خلاص خفيت، نزلت أناديها تحت البيت، راحت فين، سابتني لمين-،
راح ع القسم، يعمل محضر، افتح يابني، اكتب عندك، أما بعد، تم بحمد الله، سرقة العجلة زكية، عجلة صحيح..بمقام عربية، وعلي من يجدها..يسلمها ف أمن المديرية، وله الجزاء والثواب من عند رب البشرية، ونناشدكم سرعة ردها قبل معاد فك الرهنية.."
رد شاويش، شعره كنيش، قال" لأ مافيش، مش هعمل محضر، دي حتت عجلة، ولا ليها قيمة، ولا ليها لازمة، تعالي بكرة، معانا بدل الواحدة.. ميت قضية..خمسة بودرة وواحدة حشيش"
رد الغلبان "لأ مش ماشي، افتح محضر واثبت عندك، سرقة أغلي شئ ف حياتي!!!"
رد شاويشنا "اقعد واهدا، حشيش أو بودرة؟، شيلك واحدة!، ها!، خدت قرارك؟، يا ترجع دارك، وتشوف حالك، وتنسي زكية، يا اما تشيلك شيلة تقيلة، قصدي تشيلك يعني قضية!"
خرج الراجل، مكسور الخاطر، راح المحطة.. أخد أتوبيس، ركبه بسرعة، وعلي كوبري الجامعة، راح سواقه يا عيني فطيس، مات ف الزحمة، مات م الخضة، مات وكأنه شايف ابليس، ماحدش يعرف سبب الموتة، بس ده كان سبب الحدوتة، حدوتة إني أنا الغلبان، نطيت مكانه وقوام طيران، سوقت الأتوبيس، نجيت الناس، وبس خلاص، بعد ما كنت أنا رايح شغلي، وماشي علي مهلي، صبحت خلاص سواق أتوبيس!

شاركه على جوجل بلس

عن Mai Hanem Hamada