يوميات المواطن سكر-الثاني

#يوميات_المواطن_سكر
يوم 2
في البيت
قام السكر، قام يتمختر، بص ف ساعته وصرخة الصرخة، قال يا مصيبتي دي الساعة واحدة، ندا علي جارته الست تفيدة، ست نشيطة.. ست سعيدة، الست تفيدة سمعها تقيل، زعق علي ف صوته وقال..صحيتي امتي يا ست الناس، ردت بسنانها المسكورة.. "بتقول عايز اناناس؟"،
لقاها بتسقي الزرعة، علي معادها من وهو ف الجامعة، بحلق تاني، بحلق اكتر، الساعة واحدة، لأ.. ده الساعة واقفة، شكر الرب وضرب الركعة، كافئ نفسه بحتة عجوة، حتة كمان! .."كلها يا سكر"، قال وحياة ربنا ماهي راجعة، عزم علي نفسه عزومة م اللي هي، لأ سكر مالوش ف عزومة المراكبية..
في الشارع
لسه بيفتح بابه يادوب، لقا فار تخين ولا الدبدوب، نازل ضرب وطحن ف قطة، شخط وقاله "هي دي قدك شطة؟"، شطة ده اسم الفار صاحبه، معروف ف الحارة بهيبته وشنبه، رد الشطة "مش أحسن ما اكلها..أنا بس بعرفها غلطها!"، ضحك السكر، كمل عادي نزول ع السلم، مشي ف الحارة يسبح ربه، يبص لخلقه، بص كمان، بص وكمل، أماااا...وشوش عكرة صحيح ع الصبح، ست بتضرب جوزها كدة م الباب للطاء، قال بيلم غسيله من غير طرحة.. وصدره باين من غير حياء، وعيل صغير بيشتم امه م البلكونة، قال كل مايبعتها تجيب مخلل.. مايلقيش فيه ولا حتة زتونة، ودي واحدة تانية بتركب ايريال ع السطوح، وجوزها قاعد يشوف القنوات مع صاحبه الأستاذ ممدوح، ممدوح ده بقا نمرة، قفشوه من يومين مع سماح بتاعة غمرة، ايش حشرك انت، دع الخلق للخالق واخز الشيطان الرجيم، اقولك ليه يا بارد كانوا بيعملوا ايه.. ده ربك ستار حليم، بس هو يعني ايه اللي بيحصل لما النار تتحط جمب البنزين!؟

شاركه على جوجل بلس

عن Mai Hanem Hamada